Худкомагӣ ё демукросӣ: масири ҲНИТ куҷост?
Изҳороти Муҳаммадиқболи Садриддин дар бораи ниёз ба тағйири роҳбарияти Ҳизби наҳзати исломӣ (ҲНИТ), ки дар ҷомеаи демукросӣ як раванди табиӣ маҳсуб мешавад, дар муҳити солими сиёсӣ бояд баҳси умумимиллӣ мегашт.
Чунки чунин баҳсҳо на танҳо барои боло бурдани фарҳанги раҳбарӣ, балки барои рушди демукросӣ ва ташаккули фарҳанги сиёсӣ заруранд. Аммо, мисли ҳамеша ба ҷои баррасӣ даъво пеш оварданд, ки ин баҳси дохилии ҳизб аст. Агар дар дохили ҳизб механизми таъмини адолат ва ҳалли шаффофи масъалаҳо вуҷуд надошта бошад, пас мутмаъин бошед, ки дигар даъвоҳо дар он муҳити танг роҳи ҳали худро пайдо нахоҳанд кард.
Дар ҳар ҷомеае, ки худро демукросӣ медонад, гузариши қудрат ва механизми шаффофу одилонаи интихоби роҳбарият аз рукнҳои асосии фарҳанги сиёсӣ ба шумор мераванд. Ҳизби наҳзати исломӣ (ҲНИТ), ки худро ҳамчун нерӯи мухолифи худкомагӣ муаррифӣ мекунад, то куҷо омода аст, ки ба арзишҳо пойбанд бимонад?
Баҳси тағйири роҳбарият дар ҲНИТ, ки аз ҷониби Муҳаммадиқболи Садриддин матраҳ шуд, як масъалаи муҳимест, ки набояд танҳо як баҳси шахсӣ ва гурӯҳӣ шумурда шавад. Ин масъала ба раванди ташаккули демукросӣ дар худи ҲНИТ рабт мегирад ва ба ҷомеъа ҳам бетаъсир намемонад.
Оё як ҳизбе, ки иддаои демукросӣ ва озодихоҳӣ дорад, метавонад дар дохили худ инҳисори қудрат дошта бошад?
Зеро дар муҳити воқеан демукросӣ манфиати ҳизб ва давлат аз манфиати шахсӣ болотар аст.
Ҳизби сиёсӣ на моликияти шахсӣ аст ва на абзори хусусии касе.
Роҳбарони он намояндагони муваққатиянд ва бо иродаи аъзои ҳизб таъин ё иваз мешаванд.
Фарҳанги сиёсӣ, ки бояд пояи ҳар ҳизби сиёсӣ бошад, аз рӯйи низоми қонун, шаффофият ва рақобати озод муайян мегардад. Вақте ки шахсиятпарастӣ ва мутамарказ кардани қудрат ба як унсури асосии сиёсати дохилӣ табдил меёбанд, пас ин даъвоҳо ҳатман ба берун сар мезананд.
Ба назар мерасад, ки дар дохили ҲНИТ таҷрибаи ҳукумати худкома такрор мешавад. Ҷойивазкунии раҳбарият нест, интиқоди дохилӣ ҳамчун таҳдид қабул мешавад, ва ҳар гуна мухолифат ҳамчун душманӣ маънидод мегардад.
Агар ҲНИТ воқеан иддао дорад, ки як ҳизби демукросӣ ва ислоҳталаб аст, пас он бояд дар навбати аввал дар дохили худ арзишҳои демукросиро таъмин намояд.
Агар ҲНИТ воқеан худро як ҳизби демукросӣ мешуморад, пас бояд дар амал механизми шаффоф ва одилонаи интихоби роҳбариятро татбиқ кунад, дар роҳбарияташ тағйирот ба вуҷуд оварад, интихоботи озоду шаффоф ва роҳандозии механизми идоракунии шаффофро ба намоиш гузорад, на ин ки ба шабаҳи ҳукумат табдил гардад.
Ва суоли аслӣ ҳам ин аст, ки оё ҲНИТ ин тавоноиро дорад, ки демукросиро дар худ таҷриба кунад ва баъдан онро ба ҷомеа пешниҳод намояд, ё озодихоҳӣ ва демукросиро танҳо аз дигарон талаб доранд?
(акс аз родиюи "Озодӣ")