ОЛМОН БА ДУ НАМОЯНДАИ ҲУКУМАТИ ТОЛИБОН ИҶОЗАИ ВУРУД ДОД
Берлин, 22 июл 2025
Ҳукумати Федеративии Олмон аввалин бор аст,
ки пас аз сари қудрат омадани Толибон дар соли 2021, ба ду намояндаи ҳукумати Толибон иҷозати ворид шудан ба кишварро додааст. Ин иқдом бо мақсади мусоидат дар анҷом додани парвозҳои ихроҷӣ (депортатсия) ба Афғонистон сурат гирифтааст.
Ба иттилои Вазорати корҳои хориҷии Олмон, феълан намояндагиҳои Афғонистон дар Олмонро он нафароне идора мекунанд, ки то омадани Толибон ба сари қудрат аккредитатсия шуда буданд. Вале шумораи онҳо ниҳоят кам буда, барои расонидани хидматҳои консулӣ кофӣ нест.
Дар изҳороти расмӣ гуфта мешавад:
“Ҳукумати федералӣ манфиатдор аст, ки шаҳрвандони Афғонистон дар Олмон аз хидматрасонии муносиб ва босамари консулӣ, аз ҷумла гирифтани шиноснома, баҳравар гарданд.”
Воридшавии кормандони Толибон бо ихроҷҳои нав алоқаманд аст.
Ба гуфтаи намояндаи расмии ҳукумат Штефан Корнелиус (Stefan Kornelius), аккредитатсияи ду намояндаи нави Толибон ба таври мустақим бо парвози охирини ихроҷи шаҳрвандони Афғонистон иртибот дорад. Рӯзи ҷумъа, 81 шаҳрванди Афғонистон бори аввал аз оғози кори ҳукумати нави сиёҳу-сурх (CDU-SPD) аз Олмон ихроҷ карда шуданд.
Қайсари Олмон, Фридрих Мертс, таъкид кард, ки ин иқдом маънои эътирофи расмии режими Толибонро надорад. Ба гуфтаи ӯ, танҳо тамосҳои лозимӣ бо миёнаравии давлати Қатар барои омодасозии парвозҳо баргузор карда шудаанд.
Гарчанде ҳукумати Олмон бо Толибон муносибатҳои расмӣ надорад, масъалаи риояи ҳуқуқи инсон дар Афғонистон, махсусан ҳуқуқи занон, таҳти нигаронии шадиди ниҳодҳои байналмилалӣ қарор дошта, ҳамеша ҳар гуна муносибат бо Толибон ин нигарониҳоро зиёдтар месозад. Чанде пеш Миссияи СММ дар Афғонистон боздошти теъдоди зиёди занону духтаронро дар Кобул бо баҳонаи поймол кардани қоидаҳои либоспӯшӣ шадидан маҳкум намуд ва гуфт, ки ҷомеаи ҷаҳонӣ аз чунин рафтор “сахт нигарон” аст.
Мутаасифона, бо изҳори “нигаронӣ” чунин масоил ҳал нахоҳанд шуд ва барои ислоҳи ин камбудиҳо барномаҳои шадидтари амалӣ лозим дорем, ки дар шароити ҷаҳони муосир то ҳол меканизмашро наёфтаем.
Сарчашма: Таҳлили рӯзномаҳои олмонӣ, аз ҷумла Die Zeit, Frankfurter Allgemeine Zeitung ва изҳороти расмии намояндагони ҳукумат.
Акс: Getty Images